Dorëzohet peticioni kundër ekstradimit të Shemsi Nuhiut në Serbi

Të premten, në ora 15.00, do t’i dorëzohet peticioni me mijëra nënshkrime ministres zvicerane të drejtësisë Simonetta Sommaruga

Një delegacion i Komitetit kundër ekstradimit të Shemsi Nuhiut në Serbi, të premten do t‘i drejtohet zyrës së ministres zvicerane të Drejtësisë Simonetta Sommaruga në Bernë, ku do t‘i dorëzohet edhe peticioni me mijëra nënshkrime të mbledhura në tërë Zvicrën.

Në dorëzimin e peticionit do të marrin pjesë edhe familjarët e Shemsiut.

Avokati kosovar, Jeton Kryeziu, i cili është njëherësh anëtar i Komitetit, ka thënë për Albinfo.ch se qëllimi i grumbullimit të nënshkrimeve për të bërë një peticion është të kundërshtohet me çdo kusht vendimi eventual i institucioneve zvicerane në favor të kërkesës së autoriteteve serbe për ekstradimin e ish-pjesëtarit të UÇK-së, Shemsi Nuhiu në Serbi, por assesi të mos ndikohet në sistemin e drejtësisë në Zvicër.

“Juridikisht do të jetë vështirë të ndryshohet opinioni i Gjykatës Federale ngase edhe këtu janë të ndara pushtetet, legjislativi dhe ekzekutivi nuk i përzihen drejtësisë. Por ne kërkojmë me këtë peticion që Departamenti i Drejtësisë të rishqyrtojë rastin edhe njëherë të Shemsiut, dhe në rast se gjejnë fakte, mund t`i bëhet gjykimi edhe në Zvicër ”, ka thënë Kryeziu.

Për ekstradimin në Serbi të ish-ushtarit të UÇK-së, Shemsi Nuhiut ka vendosur javën që shkoi Gjykata Penale Federale në Bellinzona të Zvicrës.

Por kjo nuk është instanca e fundit e gjyqësisë në Zvicër. Avokatët e Shemsi Nuhiut kanë parashtruar ankesë kundër këtij vendimi, me të cilin pas disa muajve do të merret edhe Gjykata Federale me seli në Lozanë, që është instanca më e lartë e gjyqësisë zvicerane.

Më 14 prill autoritetet zvicerane kanë arrestuar shtetasin e Kosovës Shemsi Nuhiun me prejardhje nga Lugina e Preshevës dhe me qëndrim të rregullt në Vevey, kantoni Vaud.

Arrestimi i tij është bërë duke u bazuar në një aktakuzë të autoriteteve të Serbisë dhe ajo e ngarkon atë për krime lufte, të kryera, sipas saj, në Kosovë.

Në lidhje me shkrimet tona të mëhershme mbi Shemsi Nuhiun:

http://www.albinfo.ch/ch-ballkani/aktuale/do-ta-ekstradoj%C3%AB-zvicra-shtetasin-e-kosov%C3%ABs-n%C3%AB-serbi-22170Ekstradimi i Nuhiut në Serbi nuk është përfundimtarArrestimi i ish-ushtarit të UÇPMB-së në Zvicër: reagojnë autoritetet lokaleNë Zvicër arrestohet ish pjesëtari i UÇPMB-së nga Presheva