Avancohen të drejtat e punëtorëve në Kosovë

Të drejtat e punëtorëve në Kosovë kanë avancuar ndjeshëm, si rezultat i zbatimit të ligjitë të punës, ka thënë kryeinspektori i Inspektoratit të Punës, Basri Ibrahimi.

Ligji i punës gjatë një viti sa është në fuqi është duke u zbatuar në mënyrë të kënaqshme nga punëdhënësit si në sektorin publik ashtu dhe në atë privat.

Kryeinspektori i inspektoratit të punës, Basri Ibrahimi, i ka thënë Radio Kosovës se gjatë periudhës dhjetëmujore të këtij viti kanë bërë rreth 5 mijë inspektime në terren, dhe kanë vërejtur se në rreth 4 mijë e 200 raste, kompanitë kanë zbatuar ligjin e punës.

Mbikëqyrja e zbatimit të ligjit të punës është bërë si në kompanitë me shumë të punësuar, po ashtu edhe në ato me numër më të vogël të të punësuarve.

Kryeinspektori i punës, Basri Ibrahimi ka deklaruar se gjatë viteve të ardhshme ky ligj, por dhe ai për sigurinë në punë do të zbatohen edhe më shumë, dhe njëkohësisht të ngrihet vetëdija e punëdhënësve por edhe të punësuarve për të drejtat dhe obligimet që rrjedhin nga marrëdhënia e punës.