Sulmi në Schaffhausen: Pesë të plagosur, dy prej tyre rëndë

Zëdhënësja e policisë së Schaffhausenit ka thënë se nuk bëhet fjalë për sulm terrorist

Keystone/ Ilustrim

Policia në Schaffhausen është vënë në ndjekje të personit të panjohur i cili në mëngjesin e sotëm ka sulmuar disa persona në qendër të qytetit. Raportohet për pesë të plagosur, së paku dy prej të cilëve kanë marrë plagë të rënda, shkruan srf.ch.

Ndërkaq zëdhënësja e policisë së Schaffhausenit ka thënë për radion SRF se nuk bëhet fjalë për sulm terrorist. Sipas saj nuk dihet nëse sulmuesi i kërkuar është i armatosur ose jo, transmeton albinfo.ch. Megjithatë ai konsiderohet i rrezikshëm për rrethin.

Ndërkohë, pjesë të qytetit të vjetër, ku kanë ndodhur sulmet vazhojnë të jenë të bllokuara nga policia.

Në Shaffhausen, policia ka rrethuar sot, në mëngjes disa pjesë të qytetit të vjetër. Shkak për këtë masë sigurie është një “gjendje e jashtëzakonshme” që ka ndodhur aty, shkruan blick.ch dhe transmetojnë mediat tjera zvicerane.

Sipas portalit të përmendur, shkas për këtë alarmim të policisë është një person i cili po qarkullon me sharrë motorike në duar dhe duket se po kërcënon dhe sulmon njerëzit. Deri tash raportohet për së paku një njeri të lënduar në kokë, transmeton albinfo.ch.

Sipas një zëdhënëseje të policisë, policia dhe ambulanca janë të mobilizuara. Veç kësaj edhe helikopterët e Rega-s po qarkullojnë mbi këtë zonë.