Marigona Isufi, delegate e rinisë së Zvicrës në OKB

Shqiptarja Marigona Isufi, është njëra nga tre delegatët që përfaqësojnë rininë e Zvicrës në OKB

SAJV (Bashkësia Zvicerane e Punës e shoqatave Rinore) në bashkëveprim me Ministrinë e Jashtme të Zvicrës kanë zgjedhur dy zvicerane të reja dhe një zviceran për të përfaqësuar brezin e të rinjve të Zvicrës gjatë vitit 2012 në “Youth Rep” (përfaqësues të rinisë) në OKB, në Nju Jork.

Shqiptarja Marigona Isufi, është njëra nga tri përfaqësueset e zgjedhura. Marigona 19 vjeçare, mori pjesë në zgjedhjet federale të para dy muajve duke kandiduar në Bernë, për Partinë Socialdemokrate.

Përveç saj, në Nju Jork do të shkojnë si delegatë të Zvicrës edhe Lucie Rosset, 21 vjeçare nga Vaudi dhe i riu 23 vjeçar Mattia Zanazzi nga kantoni i Tiçinos.

Ata do të jenë pjesë e delegacionit zviceran dhe zëdhënës të rinisë së Zvicrës në Konferencën e OKB-së për statusin e gruas (CSW) në konferencën Rio+20 për zhvillim të qëndrueshëm si dhe në Asamblenë e Përgjithshme të OKB-së.

Krahas kësaj, ata do organizojnë aktivitete të ndryshme në Zvicër, veçanërisht në kuadrin e jubileut dhjetëvjeçar të hyrjes së Zvicrës në OKB.