Përurohet projekti për përpunimin e qumështit të dhisë

Projekti për ndërtimin e një mini-fabrike është financuar nga Komisioni Evropian dhe është implementuar nga organizata “CARE International”

Është hapur mini-fabrika për përpunimin e qumështit të dhisë në Bresalc të Gjilanit.

Duke shprehur mirënjohje për punën që po bëjnë fermerët e kësaj ane, Ministri Blerand Stavileci, ka thënë se  Ministria e Bujqësisë është duke punuar për rritjen e kapaciteteve buxhetore, në mënyrë që të përkrahen fermerët dhe bizneset e vendit.

Drejtori i organizatës “CARE International”, Kristof Stok, ka deklaruar se ky është një rast i mirë, sepse krijon mundësi për punësim.

Sipas tij, ky është një lajm i mirë për fermerët e këtij regjioni, pasi që ata tanimë kanë një pikë grumbullimi të qumështit të dhisë, nga e cila do të përfitojnë gjithë kontribuuesit dhe fermerët.

Në këtë projekt janë të përfshirë mbi 100 fermerë dhe mbi 2 mijë krerë dhi. Ky projekt parashihet se do të ketë ndikim në avancimin e gjendjes ekonomike dhe sociale në këtë rajon, dhe në të njëjtën kohë do të shërbejë si shembull edhe për regjionet tjera të vendit.