Kompania gjermane zgjeron biznesin në Kosovë

IQ-to-Link zgjerohet edhe në Mitrovicë, ku pritet punësimi i 60 punëtorëve të rinj  

Kompania gjermane IQ-to- Link pas suksesit të treguar ne Prishtinë dhe në Prizren në fushën e telekomunikimit, ka hapur sot qendrën e re edhe në Mitrovicë. Me këtë rast të pranishëm ishin ambasadorja gjermane në Prishtinë, Angelika Viets, ministri në detyrë i Punës dhe Mirëqenies Sociale, Arban Abrashi, ministrja për Dialog Edita Tahiri, nënkryetari i Komunës së Mitrovicës, Faruk Mujka, Rreze Duli, drejtuese e Agjensionit për Zhvillimin Rajonal Veri dhe pjesëmarrës të tjerë.

Kryeshefi ekzekutiv i Kompanisë gjermane “IQ-to-Link GmbH”, Jens Reichenbach theksoi se Mitrovica nuk do të jetë qyteti i fundit i aktivitetit të kësaj kompanie, por pritet që shumë shpejtë të  zgjerohen edhe në qytetet e tjera të Kosovës.

Ministri në detyrë i Punës dhe Mirëqenies Sociale, Arban Abrashi, ka falënderuar partnerët gjermanë dhe ka theksuar se veprimtaritë e tilla janë shumë atraktive për të rinjtë kosovarë.

Kjo kompani gjermane, në Mitrovicë ka punësuar gjithsej 60 punëtorë, njohës të mirë të gjuhës gjermane, polake, çeke, holandeze dhe  angleze.

Ndërkohë pritet që në të ardhmen numri i të punësuarve të rritët deri në 120.

Kompania IQ-to-Link synon që gjatë viteve 2017- 2018 në Kosovë të punësojë rreth 400 punëtorë, me të cilët do t’u ofrojë mbështetje konsumatorëve në gjithë Evropën.