Gjykata Penale Federale dënon me burg mbështetësin e ISIS-it

Ai, në qendrat e azilit ku ka punuar, ka propaganduar në favor të organizatave radikale islamike si “Al-Nusra-Front” dhe “Shteti Islamik” (ISIS)

Gjykata Federale Penale e Zvicrës i ka shqiptuar një personi, një dënim prej 30 muajsh burg, prej të cilave vetëm 6 burg efektiv ndërsa pjesën tjetër me kusht. Dënimi i është shqiptuar për faktin se ai ka propaganduar në favor të organizatave radikale islamike si “Al-Nusra-Front” dhe “Shteti Islamik” (ISIS), njofton srf.ch.

Bëhet fjalë për një shtetas zviceran, 32 vjeçar, me prejardhje turke, i cili ka punuar për një kompani private sigurimi në qendrat e azilit në Kantonin e Tiçinos, transmeton albinfo.ch. Në këto qendra ku ka punuar, ai ka provuar t`i indoktrinojë me islamin radikal një numër të strehuarish.

Veç kësaj, ai ka organizuar në dy raste udhëtime drejt zonave të luftës në Siri.

Akte të ngjashme personi tashmë i dënuar, ka kryer edhe në Itali dhe në Turqi.

Përveç dënimit me burg, ai duhet të mbulojë shpenzimet procedurale, që mbërrijnë në 133 mijë franga.