Qendrat e të dhënave mund të konsumojnë deri në 10 për qind të energjisë elektrike të Zvicrës deri në vitin 2050. Kështu vlerëson një studim i publikuar nga Shoqata e Ndërmarrjeve Elektrike të Zvicrës dhe kompania konsulente Deloitte, përcjell albinfo.ch.
Studimi shqyrton disa skenarë të zhvillimit të sektorit, prandaj shifra nuk përbën një parashikim të sigurt. Në vitin 2024, qendrat e të dhënave konsumuan rreth 2.1 teravatorë energji elektrike, ose 3.6 për qind të konsumit kombëtar.
Sipas autorëve, sfida kryesore lidhet me zgjerimin e rrjetit elektrik. Qendrat e reja mund të ndërtohen më shpejt sesa infrastruktura e nevojshme për furnizimin e tyre, duke krijuar pengesa lokale dhe rajonale në lidhjen me rrjetin. Furnizimi gjatë dimrit mbetet gjithashtu një çështje që kërkon vëmendje.
Një anketë e realizuar në kuadër të studimit tregon se pranimi i këtyre projekteve lidhet me përfitimet për komunitetin. Ndër kushtet e përmendura janë shfrytëzimi i nxehtësisë së prodhuar nga pajisjet për ngrohjen e banesave dhe shkollave, krijimi i vendeve të punës dhe mbulimi i kostove të zgjerimit të rrjetit nga operatorët./Albinfo.ch