Dorëzohet policia, u jep fund kërkimeve për 8 të zhdukurit

Policia ka marrë vendimin për të ndërprerë kërkimin duke u nisur nga rreziku për rrëshqitje të reja të dheut, dhe kështu vihen në rrezik jete edhe ekipet shpëtimtare

Keystone

Policia u ka dhënë fund kërkimeve të tetë personave të zhdukur pas rrëshqitjes së malit mbi fshatin Bondo të Kantonit Graubünden që ndodhi të mërkurën e kaluar. Ajo ka marrë vendimin për të ndërprerë kërkimin duke u nisur nga rreziku për rrëshqitje të reja të dheut, dhe kështu vihen në rrezik jete edhe ekipet shpëtimtare, shkruan srf.ch.

Kjo gjendje bëhet më e mprehtë, sidomos pas rrëshqitjes së re që ndodhi dje, e premte në po këtë lokacion, transmeton albinfo.ch. “Janë shterruar të gjitha mundësitë për kërkimin e tyre dhe tash duhet të heqim dorë ng kjo”, ka thënë për mediat  zëdhënësja e policisë, Sandra Scianguetta.

Supozohet se të zhdukurit janë mbuluar nga masat shkëmbore gjatë rënies së tyre, ka thënë zëdhënësi Policisë Kantonale të Graubüundenit, Roman Rüegg.  Ai ka shtuar se gjatë hetimeve është dëshmuar se të zhdukurit janë ngujuar nga rrëzimi i shkëmbit në pjesën e pasme të Luginës Val Bondasca. Bëhet fjalë për katër gjermanë, dy austriakë dhe dy zviceranë.