Ministri Gashi ngushëllon familjen dhe diasporën për vdekjen e Vlorë Mehmetit

“Puna e saj ekzemplare ndër vite do të mbesë udhërrëfyes për gjeneratat që do të vijnë pas”, thuhet në ngushëllimin e ministrit.

Zëvendës kryeministri dhe njëherësh  ministri i Diasporës, Dardan Gash nëpërmjet një telegrami ngushëlloi familjen Mehmeti dhe Tërshani, për vdekjen e Vlorës, shkencëtares 35 vjeçare që vdiq në Vjenë. Ministri njëkohësisht ngushëllon edhe bashkatdhetarët kosovarë për vdekjen e hershme të kësaj vajze të diasporës, që ka lënë gjurmë në Universitetin e Vjenës.

“Në këto momente të vështira të dhimbjes për humbjen e së dashurës Vlorë, ju shpreh ngushëllimet e mia më të sinqerta. Vlora ishte një nga ato vajza që spikatën me urtësinë dhe përkushtimin, ndërsa zunë vend të pazëvendësueshëm në forumet më të rëndësishme shkencore në Evropë dhe më gjerë. Puna e saj ekzemplare ndër vite do të mbesë udhërrëfyes për gjeneratat që do të vijnë pas”, thuhet në ngushëllim.

“Duke ndarë dhimbjen për humbjen e kësaj vajze të dashur dhe të respektuar nga të gjithë, pa përjashtim, gjej ngushëllim në faktin se puna e saj do të jetojë përgjithmonë, ndërsa personaliteti i saj do të mbesë përherë në mendjet e zemrat e shqiptarëve si në Kosovë, po ashtu edhe në diasporë”, shkruhet më tej në ngushëllim.

Ndryshe, pas një sëmundje të rëndë, në Vjenë të Austrisë, në moshën 35 vjeçare ka vdekur shkencëtarja shqiptare Vlorë Mehmeti –Tershani.  Vlora ka lindur me 20.03.1982 në fshatin Beçiq të Drenicës, Komuna e Vushtrrisë. Babai i saj, Hazir Mehmeti ishte ndër profesorët e parë të Biologjisë dhe aktualisht kryetar i shoqatës së mësuesve shqiptarë “Naim Frashëri” në Austri.

Në vitin 1988, pas rrethanave të reja të krijuara në Drenicë, pjesën e mbetur të gjimnazit që kishte filluar në Vushtrri, Vlora e vazhdoi në gjimnazin “Schoppenhauerstrasse, BRG 18” të Vjenës, ku në tërë historinë e gjimnazit është e para dhe e vetmja nga nxënësit emigrantë, e cila nuk e përsërit klasën sipas rregullores për përvetësimin e gjuhës. Për këtë rast, i cilësuar si rast i veçantë, kujdestarja e klasës e informon Ministrin e Mësimit të Austrisë. Me nota të larta dhe afat rekord, ajo kreu gjimnazin.

Vlora në fushën e shkencës nuk kishin të ndalur. Ajo përfundoi Fakultetin e Farmacisë në Universitetin Shtetëror të Vjenës, Magjistraturën në Tokushima (Tokushima Bunri Unviersity, Japoni), , ndërsa studimet e doktoratës i ka përpërfunduar në shtator të vitit 2016 në drejtimin e Mikrobiologjisë në Universitetin e Vjenës dhe Austrisë në përgjithësi.