Maqedonia e feston 75 vjetorin e kryengritjes antifashiste

Republikën e Maqedonisë sot shënon 75 vjetorin e kryengritjes antifashiste dhe Luftës Nacional-Çlirimtare duke organizuar një varg manifestimesh nga Qeveria, Kuvendi dhe Lidhja e luftëtarëve të komunave Prilep e Kumanovë. Kjo ditë shënoi edhe kthesën e madhe për Maqedoninë, e cila nga kjo luftë doli si republikë e ish-Jugosllavisë.

Manifestimi qendror do të mbahet para Përmendores së çlirimtarëve të Qytetit të Shkupit, në oborrin e Qeverisë.

Siç njoftojnë mediet lokale, kurora me lule do të vendosin delegacione të Lidhjes së luftëtarëve i kryesuar nga Nikolla Stojanovski, të Qeverisë nga kryeministri Zoran Zaev, të Kuvendit i kryesuar nga deputetët Juliana Nikollova dhe Dime Vellkovski, delegacion i ARM-së i kryesuar nga zëvendës-shefi i Shtatmadhorisë, gjeneral-majori Muhamet Racaj.

Tradicionalisht me rastin e festës, në Kuvendin e Republikës së Maqedonisë në mesditë do të ndahet çmimi shtetëror “11 Tetori”. Fitues të sivjetmë të çmimit për vepër jetësore janë artisti muzikor Vllatko Stefanovski në sferën e kulturës dhe artit  dhe historiani prof.dr. Amet Sherif – në sferën e arsimit.

Ndryshe, më 11 tetor të vitit 1941, luftëtarët nga Aradhet e para partizane të Prilepit e sulmuan patrullën policore bullgare dhe rrjetin telefoniko-telegrafik në Prilep, gjë që e shënoi fillimin e kryengritjes së organizuar të popullit të Maqedonisë kundër okupatorit bullgar, italian dhe gjerman për çlirimin final të vendit.

Ditën tjetër, më 12 tetor, doli edhe Aradha partizane e Kumanovës.

11 Tetori është vazhdimi i traditave çlirimtare të popullit liridashës të Maqedonisë, por edhe të përpjekjeve për çlirimin social dhe kombëtar të bëra në Luftërat ballkanike dhe në Luftën e Parë Botërore. Gjatë okupimit nga Maqedonia thuhet se janë internuar 58 mijë persona, ndërsa krahas krimeve që okupatorët i kanë kryer mbi popullatën e pafajshme civile, vendi pësoi edhe dëme të mëdha ekonomike.