Shoqata gjermane i dhuron Gllamnikut një kopsht lodrash

Ata që kanë shkuar në përurim, kanë marrë me vete edhe 15 pako kartoni me veshmbathje dhe lodra për fëmijë

Rreth 1850 kilometra janë në mes të qytetit gjermman Hude dhe fshatit Gllamnik të Kosovës (Komuna e Podujevës). Anëtarët e shoqatës humanitare  “Kinderaugen” (Sytë e Fëmijëve) ndodhen aktualisht në Gllamnik ku kanë shkuar për të përuruar një kopsht lodrash në oborrin e shkollës së fshatit dhe është financuar nga paratë e grumbulluara në Hude.

Ata që kanë shkuar në përurim, kanë marrë me vete edhe 15 pako kartoni me veshmbathje dhe lodra për fëmijë, shkruan nrwz.de

Gllamniku ndodhet në njërin ndër regjionet më të varfra të Kosovës. Shkolla e këtij fshati, e vetmja në regjion që pranon edhe nxënës të hendikepuar, deri tash nuk ka pasur shesh lojërash, transmeton albinfo.ch. Me paratë e dhuruara nga Hude (rreth 7000 euro) janë siguruar lodrat përkatëse dhe janë instaluar me angazhimin e përbashkët të prindërve dhe përfaqësuesve të shkollës.

Afrim Zhugolli, i cili jeton në Hude dhe vjen nga regjioni i përmendur kosovar ka sakrifikuar pushimet e tij verore për të organizuar ngritjen e kopshtit të lodrave.