Zyra e kryeministrit blen 3 ‘iPhone 7’ dhe 11 ‘Samsung’

Zyra e kryeministrit të Kosovës, Ramush Haradinaj ka blerë plot 14 telefona, smartphone të fjalës së fundit. 3 ‘iPhone 7’ dhe 11 ‘Samsung A5’ të vitit 2017 janë blerjet që i ka bërë zyra e të parit të qeverisë. Këto blerje luksoze i kanë kushtuar buxhetit të shtetit 6 mijë e 42 euro, raporton ‘kallxo.com’.

Blerjet kanë ndodhur një muaj pas zgjedhjes së Qeverisë Haradinaj në Kuvend.

Kur kishte publikuar njoftimin për tenderin e telefonave, Zyra e Kryeministrit ishte sqaruar me fjalët se telefoni sot nuk është mall luksi, por mjet pune, përcjell albinfo.ch.

Anëtari i Kryesisë së AAK-së, Besnik Tahiri në debatpernime në qershor të këtij viti kishte thënë se është e tmerrshme blerja e telefonave luksozë nga zyrtarët e qeverisë.

“Kjo puna e telefonave është hajgare. Është e tmerrshme me ble telefona 850 euro. Kur se ki ti tondin personal, qysh e blen ti 850 euro telefon. Kjo është punë e tmerrshme. Këtu ka punë edhe për prokurinë”, kishte thënë Tahiri në ‘DebatPernime’ me Jeta Xharrën në zgjedhjet e qershorit.