Presidenca kosovare: Beogradi pengoi dekretimin e gjyqtarëve dhe prokurorëve serbë

Dekretimi i gjyqtarëve dhe prokurorëve nga komunitetet jo shumicë, nuk ka ndodhur “për shkakun që kandidatët për gjyqtarë dhe prokurorë nuk erdhën për dekretim

42 gjyqtarë dhe 14 prokurorë të komunitetit serb nuk i janë përgjigjur sot ftesës së presidenti të  Kosovës, Hashim Thaçi për t’i dekretuar në sistemin gjyqësor kosovar. Ky proces i dekretimit, sipas një komunikatë për media lëshuar nga Zyra e Presidentit të Kosovës, është penguar nga Beogradi zyrtar, i cili po e sfidon respektimin e Marrëveshjes për Drejtësinë.

“Zyra e Presidentit ishte e gatshme të presë ardhjen dyzet e dy (42) gjyqtarëve dhe katërmbëdhjetë (14) prokurorëve nga komunitetet jo shumicë në Republikën e Kosovës, të cilët, pas dekretimit nga Presidenti i Republikës së Kosovës z. Hashim Thaçi,  do të duhej t’i bashkohen sistemit gjyqësor dhe atij prokurorial të Republikës së Kosovës. Sot, dekretimi i gjyqtarëve dhe prokurorëve nga komunitetet jo shumicë, nuk ka ndodhur “për shkakun që kandidatët për gjyqtarë dhe prokurorë nuk erdhën për dekretim”, thuhet në njoftimin e Presidencës.

Dekretimi i gjyqtarëve dhe prokurorëve nga komunitetet jo shumicë në Republikën e Kosovës, sipas Presidencës kosovare,  është edhe një nga masat afirmative, të cilat institucionet e Republikës së Kosovës i ndërmarrin për të arritur  një barazi të plotë dhe efektive të pjesëtarëve të komuniteteve në të gjitha fushat e jetës, “ekonomike, shoqërore, politike dhe kulturore. Akti i sotëm i betimit kishte këtë qëllim, për zbatimin e plotë të Marrëveshjes për Drejtësi të arritur në Bruksel, më datën 10 shkurt 2015”.

Ata nuk erdhën ngaqë, sipas Presidencës, u penguan nga Republika e Serbisë, me qëllimin e vetëm që të mos lejojë integrimin e tyre në sistemin gjyqësor dhe prokurorial të Kosovës.

“Është ky edhe një hap nga hapat e shumtë që Republika e Serbisë ndërmerr kundër qytetarëve tanë, ngase inkuadrimi i gjyqtarëve dhe prokurorëve nga radhët e komuniteteve jo shumicë në Republikën e Kosovës, ka rol të madh në jetën e komuniteteve, në realizimin e të drejtave të tyre dhe në sigurinë e qasjes së barabartë në drejtësi”, thuhet në komunikatën për emdia lëshuar nga Presidenca.

Njëkohësisht, veprimi i sotëm i pengimit të kandidatëve për gjyqtarë dhe prokurorë që të vinë sot për dekretim tek Presidenti, siç thuhet në komunikatë, është edhe një dështim dhe paaftësi tjetër e BE-së si ndërmjetësuese në këtë proces të zbatimit të Marrëveshjes për Drejtësi.

“Pavarësisht këtij dështimi të qëllimshëm të orkestruar nga Serbia, Republika e Kosovës do të vazhdojë të funksionojë, bazuar në parimet kushtetuese të gjithë-përfshirjes, prandaj ftojmë edhe një herë palët e Marrëveshjes për Drejtësi që të kryejnë obligimet e tyre. Republika e Kosovës ka përmbushur obligimet e saj në çdo aspekt”, thuhet në njoftimin e Zyrës së Presidentit të Kosovës, Hashim Thaçi.