Hoyt Yee takohet me liderët politikë në Kosovë

Zëvendës-ndihmës sekretari amerikan i Shtetit, Hoyt Brian Yee, përgjegjës për çështje evropiane dhe euro-aziatike, ka filluar vizitën në Kosovë.

Ai është takuar me presidentin Hashim Thaçi dhe kryeparlamentarin Kadri Veseli, si dhe do të takohet me kryeministrin Ramush Haradinaj, shkruan albinfo.ch.

“Perspektiva evropiane për Kosovën, si dhe për tërë rajonin, janë prioritete të SHBA-së”, u shpreh Yee, pas takimit që kishte me presidentin.

Duke folur për prioritetet e Kosovës, presidenti Thaçi u shpreh se përmbyllja e procesit të liberalizimit të vizave, përmbyllja e dialogut me Serbinë dhe transformimi i FSK-së mbesin prioritete konkrete, pa lënë anash prioritetet e përhershme që janë ekonomia dhe forcimi i sundimit të ligjit.

Vizita e zyrtarit të lartë amerikan në Kosovë, vjen pas vizitës së djeshme të tij në Serbi.

Zyrtarëve atje ai ua bëri të ditur qëndrimin e SHBA-së se nuk mund të qëndrojnë ulur në dy karrige, posaçërisht nëse ato janë larg njëra-tjetrës.