Vidhen 21 shishe me anestetikë në QKUK

Dyshimet e para janë te dy infermierë, që i kanë pasur çelësat e derës së minibarnatores, ku mbaheshin këta anestetikë

21 shishe me anestetikë, në vlerë prej 3 mijë eurosh, janë vjedhur në Klinikën e Anesteziologjisë. Ky ilaç sevofluran, i cili i takon grupit të ilaçeve si anestetik i përgjithshëm, kushton hiq më pak se 138 euro 1 shishe. Ndërsa, kur llogaritet në total, i bie se atë ditë u vodhën anestetikë në vlerë prej 3 mijë eurosh.

Sipas drejtorit të kësaj klinike, Basri Sejdiu, dyshimet e para janë te dy infermierë, që i kanë pasur çelësat e derës së minibarnatores, ku mbaheshin këta anestetikë. Ndaj infermierëve menjëherë janë marrë masa, pasi që vetëm ata kishin çelësat e minibarnatores, ku mbahej ky medikament.

Policia e Kosovës është në fazën fillestare të hetimeve dhe ka intervistuar disa persona lidhur me këtë rast, ka thënë zëdhënësja Flora Ahmeti për KTV.