Gjykohet zyrtari kufitar për mos ofrimin e ndihmës refugjates siriane

Ai nuk i kishte ofruar ndihmë sirianes shtatzënë përkundër faktit se ajo e kishte lutur për një gjë të tillë pasi që kishte gjakderdhje të mëdha

Një shërbyesi në Trupat e Rojave Kufitare të Zvicrës do t`i duhet të përgjigjet para gjyqit. Ai akuzohet për veprimin e tij jo human me rastin e dëbimit në Itali të një gruaje siriane e cila ishte pak para lindjes. Shqetësimi dhe mundimi që i shkaktoi ky dëbim, rezultoi me lindjen e fëmijës së vdekur, shkruan srf.ch.

Kjo ka ndodhur në vitin 2014 në kufirin Zvicër-Itali, në Kantonin Valis.

I përmenduri do të përgjigjet para Gjykatës Ushtarake në Bernë, në procesin që fillon më 22 nëntor të këtij viti dhe është parashikuar rë zgjasë tri ditë, bëhet e ditur për mediet zvicerane nga gjyqësia ushtarake e vendit.

Roja akuzohet për mos ofrim të ndihmës, rrezikim të jetës dhe për shkelje të rregullave të shërbimit, transmeton albinfo.ch. Ai nuk i kishte ofruar ndihmë sirianes shtatzënë përkundër faktit se ajo, sipas deklaratës së saj, e kishte lutur për një gjë të tillë pasi që kishte gjakderdhje të mëdha. Pasi ishte dëbuar në Itali, ajo, në spital e kishte lindur foshnjën e vdekur.