Haradinaj: Qeveria është partner i vazhdueshëm për prodhuesit

“Ju inkurajoj të gjithëve që të jeni krenarë për sukseset tuaja në ekonomi, për të arriturat tuaja, për profitin që realizoni dhe ju inkurajoj që të insistoni që atë profit ta investoni më tutje me zgjerimin dhe rritjen tuaj”

Në kuadër të aktivitetit, “Javët e Biznesit Kosovar”, e cila organizohet nën patronatin e Kryeministrit të Kosovës shefi i qeverisë kosovare Ramush Haradinaj mori pjesë në nisjen e këtij manifestimi tradicional, me moton,  ‘Vetëm nuk mundemi, por bashkë po’.

Ai theksoi se përkushtimin për të ndihmuar prodhuesit e kanë dëshmuar që në veprimet e para, me dialogun e filluar me prodhues, me të cilët është biseduar për hapat që duhet ndërmarrë për të lehtësuar prodhimin në vend.

“Ju inkurajoj të gjithëve që të jeni krenarë për sukseset tuaja në ekonomi, për të arriturat tuaja, për profitin që realizoni dhe ju inkurajoj që të insistoni që atë profit ta investoni më tutje me zgjerimin dhe rritjen tuaj”, tha kryeministri.  Ai ka thënë se Qeveria është partner i vazhdueshëm për prodhuesit dhe Zyra e Kryeministrit dhe çdo ministri, është edhe zyra e tyre.

Agim Shahini, nga Aleanca Kosovare e Bizneseve, ka kërkuar përkrahje nga institucionet e po ashtu kërkoi që sa më shumë të konsumohen produktet vendore.