D4D: 80 % të grave janë joaktive në tregun e punës

Hulumtimi ka treguar se shkaqet sociale që lidhen me rolet e përcaktuara gjinore janë arsyet kryesore për jo aktivizimin e  grave në treg të punës

Instituti Demokraci për Zhvillim (D4D), publikoi punimin “Joaktiviteti i grave në tregun e punës: Faktorët që mbajnë gratë jashtë tregut të punës”, transmeton albinfo.ch. Drejtor Ekzekutiv i D4D-së, Shpend Emini tha se ky hulumtim hedh dritë mbi arsyet se pse 80.2% e grave në Kosovë nuk kërkojnë punë.

Që këto gra të kërkojnë punë ato duhet të fuqizohen dhe të krijohen parakushte për një treg të barabartë për të gjithë, theksoi ai.

Ministri për Inovacion dhe Ndërmarrësi  Besim Beqaj theksoi rëndësinë e adresimit të jo-aktivitetit në nivel institucional sepse tha ai një potencial i madh i fuqisë punëtore nuk shfrytëzohet për zhvillim të mëtutjeshëm ekonomik. Fondi për inovacion i Ministrisë do të ketë një përqindje të konsiderueshme që do të ju takojë grave në mënyrë që atyre tu jepen mundësi më të mëdha.

Ky hulumtim ka treguar se shkaqet sociale që lidhen me rolet e përcaktuara gjinore janë arsyet kryesore për jo aktivizimin e  grave në treg të punës. “76.2 % etë grave nuk u është ofruar asnjë lloj trajnimi për aktivizim në tregun e punës, tek 11.9% e grave trajnimet nuk kanë pasur asnjë ndikim, ndërsa 11.9% e grave si rezultat i trajnimeve, kanë gjetur punë”  ka thënë Emini.