LDK: Qeveria Haradinaj i ka ditët e numëruara, po drejtohet me logjikën e odave

"Qeveria aktuale është izoluar plotësisht nga partnerët ndërkombëtarë, të cilët hezitojnë edhe të shfaqen në konferenca mediesh me drejtuesit e saj. Qeveria e Kosovës po bën lojëra për konsum politik me çështjen vitale të demarkacionit..."

Lidhja Demokratike e Kosovës ka numëron dështimet e Qeverisë Haradinaj në 3 muajt e parë. Kjo parti ka nisur kritikat me mënyrën se si është zgjedhur qeveria Haradinaj numrin e madh të zëvendëskryeministrave, ministrave e zëvendësministrave dështimet për anëtarësim në Interpol etj, transmeton albinfo.ch.

“Qeveria Haradinaj drejtohet me logjikën e odave, me sjellje kanunore, duke harruar se në këtë shtet ka Kushtetutë dhe ligj. Qeveria po e shpërdoron buxhetin e shtetit duke shpërndarë arbitrarisht paratë e taksapaguesve, duke falur në mënyrë joligjore borxhe për klientele dhe po ndërhyn me vendime në autoritetin e institucioneve të pavarura me Kushtetutë.

Qeveria aktuale është izoluar plotësisht nga partnerët ndërkombëtarë, të cilët hezitojnë edhe të shfaqen në konferenca mediesh me drejtuesit e saj. Qeveria e Kosovës po bën lojëra për konsum politik me çështjen vitale të demarkacionit, duke e vënë në rrezik të ardhmen e qytetarëve, lëvizjen e lirë të tyre dhe partneritetin me SHBA-të dhe vendet tjera mike”, thuhet në reagimin e LDK-së. Lidhja Demokratike e Kosovës, fton qytetarët që të mos e humbin shpresën por që të bashkuar të rikthejmë vendin në binarët e zhvillimit.