Deklaratat e Ymerit ngjallin reagime tek deputetët e Vetëvendosjes

Intervista e kryetarit të Vetëvendosjes, Visar Ymeri, në emisionin ‘Rubikon’ të KTV-së ku foli haptazi për përçarjet brenda kësaj partie nuk u ka pëlqyer disa deputetëve të kësaj partie të cilët përmes rrjetit social kanë reaguar, transmeton albinfo.ch.

Deputetja Albulena Haxhiu ka thënë se në Lëvizjen Vetëvendosje nuk është pranuar kandidimi i Albin Kurtit për kryetar të kësaj partie dhe këtë kushtëzim ajo e ka quajtur të papranueshëm.

Në një postim në Facebook, deputetja Haxhiu ka bërë thirrje që të zhvillohet demokracia në partinë e saj, derisa ka shtuar se përveç Kurtit edhe anëtarët tjerë mund të kandidojnë për kreun e partisë.

Ndërsa deputeti Liburn Aliu, ka kontestuar shumëçka që Ymeri ka thënë. “Çka tha sot Visar Ymeri nuk është qëndrimi i shumicës në Lëvizjen VETËVENDOSJE!. Madje ato janë të njëanshme dhe nuk paraqesin të vërtetën e plotë”, ka shkruar ai.

Pas intervistës ka reaguar edhe deputetja tjetër e kësaj partie, Fitore Pacolli, e cila ka shkruar se shefi i saj partiak e vendosi veten mbi Këshillin e Përgjithshëm.

“Sonte në emisionin Rubikon kryetari i Lëvizjes VETËVENDOSJE! tha se nuk e sheh Këshillin e Përgjithshëm si vendin ku duhet të zgjidhen problemet. Ani pse ai vet e pohoi që Këshilli i Përgjithshëm është organi më i lartë në Lëvizjen VETËVENDOSJE!. Ai sot vendosi veten mbi organin më të lartë të Lëvizjes. Ky është privatizim”, ka shkruar Pacolli.