Qytetarët protestuan kundër rritjes së çmimit të energjisë

Protestuesit me një deklaratë të përbashkët kërkuan krijimin e një komisioni hetimor parlamentar për t’i hetuar lidhjet e Zyrës së Rregullatorit të Energjisë me KEDS-in dhe debat në Kuvendin e Kosovës për këtë çështje

Qindra qytetarë kanë protestuar sot kundër paralajmërimit të rritjes së çmimit të energjisë elektrike. Vendtakimi i tyre ishte para ndërtesës së KEDS-it derisa protestuesit në duar mbanin pankartat me mbishkrimet si “Asnjë cent më shumë”, “S’paguaj edhe për veriun” si dhe  “A me neve a me arushën”.

Aty u shprehën pakënaqësitë ndaj vendimit të mundshëm të cilin e ka paralajmëruar qeveria, shtrenjtimin e rrymës. Rron Gjinovci njëri ndër organizatorët tha se përmes kësaj protestë synojnë parandalimin e rritjes së çmimit të energjisë. Të indinjuar me gjendjen e krijuar në aspektin energjetik, u shprehën edhe protestuesit të cilët përpos që ishin kundër shtrenjtimit të rrymës kërkuan edhe kompensimin e mjeteve financiare që paguan për vite me radhë për serbët e veriut.

Protestuesit kanë marshuar deri tek ndërtesa e Qeverisë dhe Kuvendit. Me të arritur para objektit të qeverisë, protestuesit me një deklaratë të përbashkët kërkuan krijimin e një komisioni hetimor parlamentar për t’i hetuar lidhjet e Zyrës së Rregullatorit të Energjisë me KEDS-in dhe debat në Kuvendin e Kosovës për këtë çështje.