Haradinaj thotë se do ta respektojë vendimin e Kuvendit për Specialen

Kreu i qeverisë Kosovare ka pritur në takim ambasadorët e vendeve të QUINT-it me të cilët ka biseduar për iniciativën e disa deputetëve për shfuqizimin e ligjit për Gjykatën Speciale

Kryeministri i Kosovës, Ramush Haradinaj, në vizitën që ka pasur në QKUK ka deklaruar se çfarëdo vendimi që merret nga Kuvendi do ta respektojnë, transmeton albinfo.ch.

“Mua më ka punësuar Parlamenti. Çfarëdo vendimi që marrin të zgjedhurit e popullit, Qeveria është e obliguar ta respektojë”, ka thënë Haradinaj. Ai ka thënë se formimi i Gjykatës Speciale për Kosovën nuk ka qenë vendim i drejtë. Ndërsa ka theksuar se Kosova ka qenë dhe do të mbetet vend shembullor për respektimin e ligjit ndërkombëtar.

Më herët kreu i qeverisë Kosovare ka pritur në takim ambasadorët e vendeve të QUINT-it me të cilët ka biseduar për iniciativën e disa deputetëve për shfuqizimin e ligjit për Gjykatën Speciale të cilën po e kundërshtojnë ambasadorët.