Ndotje alarmante e ajrit në Prishtinë

Keystone (AP Photo/Visar Kryeziu)

Ndotja e ajrit gjatë verës në Prishtinë, por në veçanti gjatë dimrit, kohë pas kohe tejkalon për 300 herë mesataren e lejuar.

Qytetarët kërkojnë zgjidhje të këtij problemi, sepse po ndikon në shëndetin e tyre, kurse kompetentët thonë se po punojnë për hartim të një rregulloreje. E kjo ndotje u shtua gjatë ndezjes së fishekzjarrëve për natën e Vitit të Ri, raporton televizioni publik i Kosovës.

Disa qytetarë, nivelin e lartë të ndotjes e lidhin me kushtet ekonomike, ku shumica e qytetarëve përdorin thëngjill për ngrohje, për arsye se është më pak i kushtueshëm, përcjell albinfo.ch.

Ndërkohë, Albert Maloku, banues në Prishtinë thotë se është momenti i fundit që qeveria të merr masa.

Bazuar në ueb-sajtin e Agjencisë për Mbrojtjen e Mjedisit e cila monitoron cilësinë e ajrit në Kosovë, vetëm në Prishtinë, gjatë ditëve të fundit, vlera mesatare te ndotjes e ajrit ka kaluar mbi 300 herë shkallën e lejuar sipas indeksit të cilësisë së ajrit, e që cilësohet si e rrezikshme dhe e dëmshme.