Haradinaj: Rritja e pagave për mësimdhënësit, vetëm 4 për qind

Haradinaj pati kritika të shumta për mësimdhënësit, e madje ka kërkuar përgjegjësi nga ta

Kryeministri i vendit, Ramush Haradinaj, edhe një herë ka deklaruar se rritja e pagave për mësimdhënës do të jetë vetëm 4 për qind, ashtu siç ka qenë premtimi elektoral.

Lidhur me deklaratat e zyrtarëve sindikalë se kryeministri ia ka rritur pagën vetës dhe vartësve të tjerë të qeverisë për 100 %, Haradinaj tha se ky është vendim politik, e rritja e pagave duhet të bëhet sipas meritave.

Këto deklarata Haradinaj i bëri gjatë një vizite që e bëri në Ministrinë e Arsimit, ku u tha se është diskutuar rreth përgatitjeve për testimin ndërkombëtar PISA, si dhe përkrahjen e pakufizueshme që, sipas tij, do ta ofrojë Qeveria e Kosovës për këtë sektor. Haradinaj pati kritika të shumta për mësimdhënësit, e madje ka kërkuar përgjegjësi nga ta.

“E di që ka mësimdhënës të tillë që gjatë orëve mësimore luajnë shah, madje nëpër shkolla në vise më të largëta të vendit bëhen 3 ndërrime bashkë sa për të realizuar pak mësim, por kjo duhet të ndryshojë. Secili duhet të marrë përgjegjësitë për të cilat është ngarkuar, sepse nuk është e drejtë që nxënësit tanë të vuajnë nga papërgjegjësitë e dikujt”, ka shtuar Haradinaj.

Sipas Haradinajt, arsimi është prioritet i tij, edhe pse kohët e fundit ka qenë i zënë në zgjidhjen e problemit energjetik në vend.