Haziri përmend ndihmën helvetike për furnizim me ujë në Gjilan

Përveç marrëveshjes trepalëshe, Komunë-Hidromoravë dhe qeverinë zvicerane, e vlefshme mbi 800 mijë euro, do të ketë edhe investime tjera në ujësjellësin e Gjilanit

Kryetari i Komunës së Gjilanit, Lutfi Haziri ka përmendur ndihmën e madhe që ka dhënë Qeveria zvicerane për furnizimin me ujë për qytetarët e Gjilanit. Këto komente Haziri i ka bërë gjatë një takimi që ka zhvilluar me përfaqësuesit e Kompanisë Regjionale të Ujësjellësit “Hidromorava” udhëhequr nga drejtorin Muhamet Suliqi.

Kryetari Haziri tha se bashkëpunimi dhe koordinimi i vazhdueshëm me këtë ndërmarrje do të vazhdoj në mënyrë permanente, me qëllim të realizimit të projekteve të përbashkëta. Ai po ashtu tha se përveç marrëveshjes trepalëshe, Komunë-Hidromoravë dhe qeverinë zvicerane, e vlefshme mbi 800 mijë euro, do të ketë edhe investime tjera nga Komuna për investimin në rrjet të ujësjellësit në disa lagje dhe fshatra të qytetit.

Numri një i gjilanasve pohoi se po qeveria komunale po punon që t’i zgjidh problemet e rrjetit të vjetruar  të ujësjellësit, duke bërë zgjidhje afatgjate për ujin e pijshëm për banorët e lagjeve dhe fshatrave të Gjilanit.

Ndërkaq, drejtori i KRU “Hidromorava”, Muhamet Suliqi, e ka falënderuar kryetarin Haziri për pritjen dhe bashkëpunimin e deritanishëm, duke besuar që ky bashkëpunim do të intensifikohet edhe më shumë në të mirë të qytetarëve.