Mbi 2000 veta protestojnë kundër heqjes së taksës për transmetuesin publik

Nëse do të fitojë iniciativa “No Billag”, kjo do të jetë përfundimisht mbyllje e radios dhe televizionit publik në gjuhën italiane në Zvicër, RSI. Në një rast të tillë do të mbeteshin pa punë 1500 punonjës

Më shumë se 2000 veta kanë demonstruar sot në Bellinzona, kryeqytetin e Kantonit më jugor të Zvicrës, Tiçinos. Demonstrimi i tyre është bërë për të kundërshtuar iniciativën “No Billag” dhe për të mbështetur shërbimin publik të radiodifuzionit, siç njofton Agjencia e Lajmeve SDA.

Nëse do të fitojë iniciativa “No Billag”, kjo do të jetë përfundimisht mbyllje e radios dhe televizionit publik në gjuhën italiane në Zvicër, RSI, transmeton albinfo.ch. Në një rast të tillë do të mbeteshin pa punë 1500 punonjës, kanë thënë organizatorët.

Duhet theksuar se në kantonin italishtfolës të Tiçinos, ashtu sikurse edhe në zonat tjera të populluara me etnitë pakicë, ofrimi i shërbimt publik të radios dhe televizionit ka rëndësi jetike, shkruan albinfo.ch. Është kështu për shkakun e thjeshtë se zona e vogël e mbulimit dhe numri i vogël i publikut nuk mundëson një ofertë serioze dhe të besueshme të informimit nëse ajo nuk mbështetet nga shteti.