Mediat e huaja: Rona një zë ndryshe

Gazeta britanike “Mirror’’ shkruan:“E pazakontë: Rona Nishliu e Shqipërisë kishte një tingull krejtësisht ndryshe”

Përfaqësuesja e Shqipërisë në Eurovision, këngëtarja kosovare Rona Nishliu ka shënuar sukses rekord në historinë e përfaqësimit të Shqiprisë në këtë garë të këngës evropiane. 

Nga 26 shtetet finaliste, ajo është renditur e pesta, në sajë të votimeve nga 42 shtete.  Përveç votave të shteteve dhe duartrokitjeve të publikut, Rona Nishliu, ka marrë edhe shumë komente nga mediat e huaja. 

Komentatori i televizionit shtetëror kroat, para performancës së saj kishte këshilluar shikuesit. “Largoni gotat e kristalta, pasi mund të thyhen’’, duke nënkuptuar kështu fuqinë vokale të këngëtares kosovare. 

Gazeta britanike “Mirror’’ shkruan:“E pazakontë: Rona Nishliu e Shqipërisë kishte një tingull krejtësisht ndryshe”.

Megjithatë, ashtu siç është shkruar dhe më parë, kënga e Rona Nishliut, ka ndarë Evropën në dysh, në ata që e admirojnë origjinalitetin dhe vlerat artistike dhe ata që do ia ulin zërin televizorit gjatë interpretimit të Shqipërisë. 

Me këta të fundit, duket të jetë revista britanike ‘’The guardian’’ e cila shkruan: “Shtrëngohuni, njerëz, pasi në radhë është Shqipëria, me Rona Nishliun që këndon “Suus’’. Them këndon, megjithëse më shumë ngjan me vajtimin e një ariu të plagosur’’. 

“The Guardian’’ komenton edhe flokët e saja, ndërsa paraqitjen e komenton si “tmerrësisht të ngjashme me Bjork’’. Të tjerët vazhdojnë të komentojnë, derisa shqiptarët anembanë botës krenohen me suksesin e saj dhe përfaqësimin dinjitoz.