Protestohet në Prishtinë, kaos në trafik

Kjo masë e ndalimit të qarkullimit të automjeteve nga ora 06:00 deri në orën 22:00 është ndërmarrë nga Komuna e Prishtinës bashkë me ministrinë e Mjedisit dhe Planifikimit Hapësinor për shkak të gjendjes alarmante të ndotjes së ajrit

Sot është protestuar në Prishtinë për shkak të ajrit të ndotur që po mbizotëron, sidomos në ditët e fundit, shkruan albinfo.ch.

Qëllimi i protestës është që të ndërmerren masat dhe pastrohet ajri, që është shumë i dëmshëm.

Derisa protesta është zhvilluar para Teatrit Kombëtar, në kaos në orët e para të mëngjesit ka qenë një kaos i vërtetë, pasi veturat nuk janë lënë të hynë në qendër të Prishtinës.

Zonat e ndaluara përfshijnë: Bulevardi “Bill Klinton”, nga udhëkryqi i rrugëve “Idriz Gjilanit” dhe “Bekim Fehmiut”, gjegjësisht deri te shtatorja “Bill Klinton”, Bulevardi “Dëshmorët e kombit”, nga rrethrrotullimi i flamurit, rruga “Agim Ramadani” nga udhëkryqi i konvikteve, rruga “Edmond Hoxha” te Salla “1 tetori”, rruga “Ilir Konushevci” nga hyrja e drejtimit të Podujevës dhe hyrja nga rrethrrotullimi i lagjes “Arbëria” në rrugën e UÇK -së dhe “Fehmi Agani”.

Kjo masë e ndalimit të qarkullimit të automjeteve nga ora 06:00 deri në orën 22:00 është ndërmarrë nga Komuna e Prishtinës bashkë me ministrinë e Mjedisit dhe Planifikimit Hapësinor për shkak të gjendjes alarmante të ndotjes së ajrit.

Ndërkohë, Komuna e Prishtinës njofton qytetarët se transporti është falas në linjat publike, të Trafikut Urban.

“Pra, Qeveria e Kosovës subvencionon vetëm ato linja. Rrjedhimisht, linjat private vazhdojnë të funksionojnë si çdo ditë tjetër. Për më tepër, në autobusët e linjave tona publike, sot nuk ka as konduktorë e as arka fiskale, pikërisht që t’i shmangim gabimet eventuale”, thotë komuna në njoftimin për media.