Çadi njeh Republikën e Kosovës

Republika e Çadit është vendi i 91 që njeh shtetin sovran dhe të pavarur të Kosovës

Përmes një note verbale dërguar Ministrisë së Punëve të Jashtme të Kosovës, Qeveria e Republikës së Çadit ka konfirmuar njohjen e pavarësisë së Kosovës nga ky shtet.

“Qeveria e Çadit njofton MPJ të Republikës së Kosovës se Republika e Çadit edhe formalisht njeh Kosovën shtet të pavarur dhe sovran”, thuhet në notën verbale të Qeverisë së Çadit të cilën e konfirmon nëpërmjet një komunikate Zyra për Informim e Ministrisë së Punëve të jashtme të Kosovës.

Një muaj më parë, siç thuhet në njoftim, shefi i diplomacisë kosovare, Enver Hoxhaj në Ambasadën e Çadit në Paris kishte zhvilluar një takim me Ministrin e Jashtëm të Çadit, Moussa Faki Mahamat. Në këtë takim, Hoxhaj kishte marr konfirmimin që Republika e Çadit shumë shpejt do të publikojë vendimin për njohjen e Kosovës.

“Njohja e Republikës së Çadit vjen në kohën kur Ministria e Punëve të Jashtme dhe institucioneve tjera të përfshira në procesin e njohjeve po bëjnë përpjekje maksimale për përmbylljen e plotë të këtij procesi”, konsideron MPJ.

Ndryshe, Çadi ndodhet në pjesën qendrore-veriore të Afrikës, ndërsa në veri kufizohet me Libinë, në lindje me Sudanin, në jug me Republikën e Afrikës Qendrore, në jug-perëndim me Kamerunin e Nigerinë dhe në veri-perëndim me Nigerin.

Republika e Çadit është shteti i 91-të që njeh Republikën e Kosovës. Ministri Hoxhaj, ka deklaruar se shumë shpejt do të vijnë edhe dy njohje të tjera.