Rama: Jemi në pritje të vendimit politik për transformimin e FSK-së

Në Komisionin për Punë të Brendshme dhe Siguri, Rama theksoi se nuk ka asnjë tendencë që është duke u ndërtuar një forcë që është rrezik për dikë tjetër, por një forcë, e cila është në interes të të gjithëve

Komandanti i përgjithshëm i FSK-së, Rrahman Rama, ka deklaruar se kjo forcë është e gatshme në çdo moment dhe kurdo që merret vendimi politik për transformimin në Forca të Armatosura.

Në Komisionin për Punë të Brendshme dhe Siguri, Rama theksoi se nuk ka asnjë tendencë që është duke u ndërtuar një forcë që është rrezik për dikë tjetër, por një forcë, e cila është në interes të të gjithëve.

Deputeti nga Vetëvendosje, Rexhep Selimi, tha se FSK është institucioni më kredibil në vend. Sipas tij, kjo më së miri manifeston dëshirën e qytetarëve për ta pasur mbrojtjen ushtarake të saj.

Deputeti i PDK-së, Fatmir Xhelili, kërkoi nga komandanti Rama të sqarojë procesin e transformimit dhe kohën deri të ndodhë kjo. Ndërsa Rama tha se është e pamundshme të ndërrohet një mision për një kohë të shkurtër, por shtoi se ajo mund të shkurtohet nëse institucionet vendosin.