30 ditë paraburgim për dy hakerët kosovarë të kërkuar nga SHBA

Dy qytetarët e Kosovës janë në mesin e 36 personave ndaj të cilëve Departamenti amerikan i Drejtësisë ka ngritur akuza për përfshirje në skema të mashtrimeve kibernetike dhe vjedhjeje përmes identitetit

Prokuroria e Shtetit e Kosovës ua ka caktuar masën e paraburgim prej 30 ditësh dy hakerëve nga Kosova, të cilët po akuzohen edhe nga Departamenti amerikan i Drejtësisë.

Kështu ka bërë të ditur zëdhënësi i Prokurorisë së Kosovës, Ekrem Lutfiu për mediat kosovare, shkruan albinfo.ch.

Liridon Musliu dhe Besart Hoxha, u arrestuan më 6 shkurt nga Policia e Kosovës, pasi që ishin kërkuar nga Departamenti amerikan i Drejtësisë.

Dy qytetarët e Kosovës janë në mesin e 36 personave ndaj të cilëve Departamenti amerikan i Drejtësisë ka ngritur akuza për përfshirje në skema të mashtrimeve kibernetike dhe vjedhjeje përmes identitetit.

Nga ky krim kibernetik, është vlerësuar se janë shkaktuar dëme që kalojnë vlerën prej 530 milionë dollarëve amerikanë humbje për konsumatorët, bizneset dhe institucionet financiare.