Gjermania kundër ndryshimit të kufijve

Ambasadori Reichel ka thënë se ndryshimi i kufijve do të ketë efekt domino në gjithë Ballkanin Perëndimor

Ambasadori i Gjermanisë në Kosovë, Ernest Reichel deklaroi se ndryshimi i kufijve në Ballkan do të kishte pasoja të mëdha për rajonin, ndërsa përpjekjet e tilla nuk do të përkrahen nga komuniteti ndërkombëtar.

Këto komente ai i bëri gjatë një ligjërate në Kolegjin për Integrime Evropiane (ISPE) me temën: ”Modeli gjermano- francez si model për Ballkanin Perëndimor”.

“Komuniteti ndërkombëtar nuk do të përkrahë në asnjë formë ndryshimin e kufijve në Ballkan dhe diçka e tillë do të kishte pasoja të mëdha. Nëse i përcaktoni kufijtë në Kosovë në baza të kriterit etnik, krijon një domino efekt në Ballkanin”, ka thënë diplomati gjerman.

Ambasadori Reichel po ashtu foli edhe për çështjen e veriut të Kosovës, për të cilin tha se nuk mund të jetë rast i izoluar nga problemet e tjera, përfshirë edhe ai i Luginës së Preshevës.

”Veriu nuk mund të izolohet nga ndikimi në Luginën e Preshevës, nga çështja e shqiptarëve në Maqedoni apo edhe nga Republika Serbe në Bosnjë e Hercegovinë. Në rastin e veriut të Kosovës është e qartë se nuk mund të jetë çështje e izoluar nga problemet e tjera”, ka deklaruar Reichel.

Ambasadori gjerman e ka përshëndetur vendimin e qeverisë së Kosovës për hapjen e Zyrës Administrative në veriun e Mitrovicës. Ky veprim i qeverisë, sipas tij, është një hap për të shtrirë autoritetin në atë pjesë. “Kjo zyrë është edhe një ofertë e mirë për qytetarët e atjeshëm”, ka thënë ambasadori i Gjermanisë në Kosovë.