Kuvendi Shqiptar ngrit kallëzim penal

Pas incidenteve të 26 majit 2012, ku gjatë ndeshjes futbollistike në mes të Spanjës dhe Serbisë në stadiumin AFG Arena në Saint-Gallen të Zvicrës u dogj flamuri shqiptar dhe u brohoritën parulla raciste antishqiptare nga tifozët serbë, Kuvendi Shqiptar në Zvicër ka ngritur dje kallëzim penal te Prokuroria e Qytetit të Sant-Gallenit.

Në komunikatën e Kuvendit, ndër të tjera thuhet: «Gjatë ndeshjes disa fansa brohoritën në gjuhën serbe “vdekje shqiptarëve”, por edhe disa fyerje të tjera kundër popullit shqiptar. Ata gjithashtu dogjën edhe flamurin shqiptar. Këto ngjarje të rënda, të cilat plotësojnë kushtet për disa vepra penale, kanë qenë shumë pak të përcjella nga mediat e vendit.

Kuvendi i Shqiptarëve të Zvicrës konstaton që ngjarjet e lartpërmendura janë shumë shqetësuese dhe fyese për popullin shqiptar në përgjithësi, e për komunitetin shqiptar në Zvicër në veçanti. Sjellje të tilla janë për t’u dënuar, sepse ngrisin tensione dhe ushqejnë urrejtjen ndërmjet etnive».

Kuvendi po ashtu thekson se këto incidente paraqesin shkelje të normave juridike në vend: «Në një shtet të së drejtës secili individ përgjigjet për shkelje të ligjit dhe principeve të tjera të shtetit ligjor. Andaj Kuvendi i Shqiptarëve të Zvicrës kërkon ndjekje ligjore për autorët e veprave të kundërligjshme në përputhje me kodin penal zviceran».