Kosova bëhet me udhërrëfyesin e vizave

Udhërrëfyesi për Kosovën përmban 101 kritere, që është për dy herë më shumë nga ato të vendeve të rajonit

Sot në Bruksel, ministres për integrim Vlora Çitaku i është dorëzuar nga komisioneria e BE-së Cecilia Malmstrom dokumenti me udhërrëfyesin për liberalizimin e vizave. Delegacioni i Kosovës, ku bënte pjesë edhe ministri i brendshëm, Bajram Rexhepi, ka shprehur optimizmin për plotësimin e kritereve të kërkuara nga udhërrëfyesi.

Udhërrëfyesi për Kosovën përmban 101 kritere, që është për dy herë më shumë nga ato të vendeve të rajonit. Zyrtarët e BE-së kanë sqaruar se kjo është bërë në mënyrë që të mos përsëriten gabimet e bëra me shtetet e rajonit.

Për ministren e integrimit, Vlora Çitaku marrja e udhërrëfyesit është fryt i punës së përgjithshme të institucioneve të Kosovës. Mirëpo ajo nuk ka përmendur ndonjë afat se për sa kohë do të mund të arrihet liberalizimi i vizave.

Vendet e rajonit është dashur të prisnin liberalizimin e vizave nga dy deri në tre vite pas marrjes së udhërrëfyesit. Por, drejtuesit e institucioneve të Kosovës, kanë optimistë dhe shpresojnë se në rastin e Kosovës, liberalizimi i procesit të vizave do të marrë më pak kohë.