Shkupi subvencionon fluturimet me kosto të ulët

“Wizz Air” do të fluturojë dy herë në javë nga Shkupi për në Milano, Ajnthoven, Dortmund, Mynih, Malmo, dhe tri herë në javë për në Bazel

Qytetarët e Maqedonisë që nga fillimi i nëntorit do ta kenë mundësinë të fluturojnë nga aeroporti i Shkupit në gjashtë destinacione të reja, me çmime të ulëta,  të cilat do të ofrohen nga kompania ajrore hungareze me kosto të ulët “Wizz Air”, e që do të subvencionohen nga qeveria maqedonase.Kjo është bërë e ditur të enjten nga ministri maqedonas i Transportit dhe Lidhjeve, Mile Janakieski, raportojnë mediat e Shkupit .

Ai i bëri publik vendimin e qeverisë maqedonase për të subvencionuar kompaninë ajrore hungareze “Wizz Air”, e cila është zgjedhur për të bërë promovimin dhe zhvillimin e trafikut ajror.

“Wizz Air”, do të marrë subvencione për një periudhë prej tre vjetësh nga 28 tetori 2012, për të mundësuar fluturime dy herë në javë për në Milano në Itali, Ajnthoven në Holandë, Dortmund dhe Mynih në Gjermani,  dhe  dy herë në javë nga 29 tetori për në Malmo, dhe tri herë në javë nga 30 tetori për në Bazel të Zvicrës .

Kompania  ajrore “Wizz Air” ka ofruar alternativa edhe të një destinacioni tjetër për në Bruksel, që mund të realizohet në të ardhmen.