KFOR-i mbyll vendkalimet ilegale në veri

Mitrovicë. Paqeruajtësit ndërkombëtarë të KFOR-it, të shtunën në mëngjes kanë marrë një aksion për mbylljen e vendkalimeve ilegale në afërsi të vendkalimit kufitar Bërnjak që lidhë Kosovën me Serbi në pjesën veriore të vendit.

“Ky operacion ka filluar në ora 5:30 në mëngjes dhe ka për qëllim krijimin e një ambient të qetë dhe të sigurt, duke i parandaluar lëvizjet e paautorizuara përgjatë vijës kufitare administrative” thuhet në një njoftim Zyra për informim e KFOR-it.

KFOR-i, siç thuhet në njoftim, ka vendosur disa pika kontrolli të automjeteve dhe ka bërë kordonin e disa zonave për shkaqe sigurie.

“Ky aktivitet bëhet në mbështetje të operacioneve që kanë të bëjnë me mbylljen fizike të pikave të paautorizuara kufitare. Pas përfundimit të suksesshëm të operacionit të mbylljes, pikat e kontrollit të automjeteve do të largohen dhe kordonët përreth zonave të siguruara do të hiqen”, thuhet më tej në njoftim.

Ky vendkalim i paautorizuar së shpejti do të jetë i pakalueshëm për shkak të barrierës fizike të vendosur nga KFOR-it, ndërsa sipas njoftimeve të para,  nuk është raportuar ndonjë incident.

Ky aksion i KFOR-it pason pas atij dy javë më parë për heqjen barrikadës në Bërnjak e cila rezultoi me pesë perona të plagosur, prej tyre dy ushtarë të KFOR-it.

Që nga mbyllja e pikës kufitare 1 dhe 31 dhe dislokimit të policëve dhe doganierëve kosovarë e ndërkombëtarë, serbët lokalë kanë shfrytëzuar rrugët alternative Serbi-Kosovë me qëllim që t’i kinin taksave doganore. KFOR-i edhe më parë ka marrë aksione për mbylljen e këtyre pikave kufitare ilegale.