Shtetasi i Maqedonisë ndryshon emrin për të hyrë në Zvicër: Dëbohet për të pestën herë

Ndaj tij ishte vendosur që në vitin 2010 një ndalim i pakufizuar hyrjeje në Zvicër. Por që atëherë ai kishte hyrë katër herë dhe po kaq herë ishte dëbuar nga Zvicra

Ai kishte tashmë katër ndalesa për të hyrë në Zvicër dhe, që të mund të hyjë për të pestën herë, shtetasi 55 vjeçar i Maqedonisë kishte ndryshuar identitetin. Ai kishte marrë në Maqedoni dokumente me emër e mbiemër tjetër, shkruan tagblat.ch. Por 55 vjeçari ia ka parë sherrin kujtesës së pagabueshme të një polici në St. Gallen kështu që edhe përpjekja e pestë për të hyrë dhe punuar në Zvicër i kishte shkuar dëm.

Sipas njoftimit që ka bërë policia të shtunën, personi i përmendur kishte rënë në sy gjersa po punonte në një kantier ndërtimi, transmeton albinfo.ch. Ai i kishte treguar policisë një letërnjoftimi të Maqedonisë dhe një tjetër të Bosnjës si dhe një patentë shoferi.

Por policit ndërkaq i kujtohet se ky ishte pikërisht njeriu të cilin më parë e kishte paditur për punë në të zezë. Në fund punëtori ka pranuar se ka bërë ndryshimin e emrit në vendin e tij të prejardhjes. Përmes këtij ndryshimi ai kishte marrë dokumente të reja identiteti dhe udhëtimi (pasaportë).

Përmes emrit të tij të mëparshëm, të vërtetë, policia ka konstatuar se shtetasi i Maqedonisë ndodhej në regjistrin zviceran të kërkimit për arrestim të tij. Ndaj tij ishte vendosur që në vitin 2010 një ndalim i pakufizuar hyrjeje në Zvicër, përcjell albinfo.ch. Por që atëherë ai kishte hyrë katër herë dhe po kaq herë ishte dëbuar nga Zvicra.

Ndaj punëdhënësit të tij, një 53 vjeçar po ashtu nga Maqedonia është bërë kallëzim penal.

(Foto: ilustrim)