Haradinaj arsyetohet për rritjen e pagave

Sipas Haradinajt, nuk mund të rangohet kryeministri bashkë me kryetarin e Këshillit Prokurorial

Kryeministri i Kosovës, Ramush Haradinaj në interpelancën për rritjen e pagave ka dhënë sqarimin se përse i ka rritur pagat për kabinetin qeveritar.

Sipas Haradinajt, nuk mund të rangohet kryeministri bashkë me kryetarin e Këshillit Prokurorial, përcjell albinfo.ch.

“Rritja ka mundësuar nivelizimin e pagave. Në listën e renditjes së nivelit të pagave, kryeministri i vendit tuaj është numër 69. Pra, janë 69 zyrtarë tjerë që marrin pagë më të madhe. Është edhe kryetari i Këshillit Prokurorial. Pse është kështu?  Në bazë të rangut, kryeministri e ai i Këshillit Prokurorial nuk mund të jenë në numrin 69. E kam pa vlerësimin e AKK-së, të gjithë jemi jopartiak e partiak dhe e kemi parë mënyrën si i kanë argumentuar ato”, ka thënë ai.

Tutje, Haradinaj ka bërë me dije se çfarëdo vendimi që merr Gjykata Kushtetuese, ai do e marrë për bazë.

Sido që të jetë, kryeministri i Kosovës është shprehur se është e habitshme që kryeprokurori të jetë në një radhë me kryeministrin.

“Ky vendim është në Gjykatën Kushtetuese, si e tillë pres përgjigjen e Gjykatës, e kemi pezulluar. Është e habitshme indiferenca që ka ndodhë në të kaluarën, po e lëmë ministrin e kryeministrin, por edhe kryeprokurori është në numër 69, e shiheni në listë si janë pagat tjera, tregon vetvetiu se cili ka qenë orientimi ynë”, ka thënë ai.