Ministri Sefaj: Pronari i veturës nga e cila u vra Ivanoviq, është serb

"Pronari gjendet në Serbi, kemi kërkuar nga policia serbe që të fillojnë hetime ndaj pronarit të makinës. Në këtë mënyrë e kemi përfshirë në hetime policinë serbe"

Ministri i Brendshëm, Flamur Sefaj ka folur lidhur me hetimet për vrasjen e politikanit serb Oliver Ivanoviqit duke zbuluar se Policia e Kosovës e  di emrin e pronarit të veturës nga e cila dyshohet se u vra Ivanoviq dhe se ai  është serb nga Serbia.

Ministri në një emision në KTV ka thënë se dy policë të Kosovës të komunitetit serb të arrestuar ditë më parë ishin të përfshirë në manipulimin e provave lidhur me vrasjen e Ivanoviqit.

“Fatkeqësisht kemi parë se dy policë të Kosovës të komunitetit serb, kanë qenë të përfshirë në këtë rast dhe është bërë arrestimi i tyre. Të gjeturat e para i ka bërë menjëherë policia, ka mbërritur në gjurmët e makinës prej së cilës siç duket është kryer vrasja dhe kemi arritur që të identifikojmë pronarin e makinës.

Pronari gjendet në Serbi, kemi kërkuar nga policia serbe që të fillojnë hetime ndaj pronarit të makinës. Në këtë mënyrë e kemi përfshirë në hetime policinë serbe. Informatat e tyre kanë qenë mjaft të përgjithshme dhe ende është duke u hetuar. Presim që të ketë informata edhe nga pala serbe. Ne kemi emrin dhe mbiemrin e këtij qytetari serb, shtetas i Serbisë”, është shprehur ministri Sefaj