Shqipëria e Kosova bashkëpunojnë në menaxhimin e mbështetjes buxhetore 

Të dy vendet njoftojnë se do të angazhohen të rrisin bashkëpunimin mes tyre lidhur me menaxhimin e mbështetjes buxhetore sektoriale në fushën e reformave për menaxhimin e financave publike

Me qëllim të rritjes së bashkëpunimit, një delegacion i Ministrisë së Financave të Kosovës ka zhvilluar një vizitë studimore në Ministrinë e Financave dhe Ekonomisë së Shqipërisë.

Të dy vendet njoftojnë se do të angazhohen të rrisin bashkëpunimin mes tyre lidhur me menaxhimin e mbështetjes buxhetore sektoriale në fushën e reformave për menaxhimin e financave publike.

Zëvendësministri i Financave i Shqipërisë, Erjon Luçi, shprehu mirënjohjen dhe gatishmërinë për të shkëmbyer përvojën disavjeçare të Shqipërisë për mbështetjen buxhetore. Gjithashtu, ai e cilësoi shumë të dobishme këtë vizitë për të shkëmbyer eksperiencat e mira që secili vend ka.

E homologu  i tij kosovar, Fatmir Gashi, vlerësoi se strategjia e menaxhimit të financave publike, si shtylla e tretë në kuadër të reformave të administratës publike në Kosovë, është një hap i rëndësishëm për vendin, por edhe në rrugën e përbashkët drejt Bashkimit Evropian.