Në Kanada kishte interesim të madh për minierat e Kosovës

Në seancën për Kosovën, të pranishme ishin kompani edhe nga Kina, Bullgaria, Turqia, Shqipëria, Azerbajxhani dhe Republika Demokratike e Kongos

Një delegacion i qeverisë së Kosovës i kryesuar ministri i Diasporës dhe Investimeve Strategjike, Dardan Gashi, po qëndron në një vizitë në Toronto të Kanadasë për të prezantuar resurset minerare të Kosovës në konventën më të madhe të Minierave në botë, PDAC 2018.

Në njoftimin për media thuhet se pala kosovare ku po marrin pjesë edhe ministri i Zhvillimit Ekonomik, Valdrin Lluka, drejtori i Trepçës, Ahmet Tmava dhe zyrtarët më të lartë të KPMM-së, kanë bërë prezantim e resurseve para më shumë se 10 kompanive të mëdha, shumica nga Kanadaja, të cilat kanë shprehur interesimin e tyre për investim në sektorin minerar të Kosovës, përcjell albinfo.ch.

“Në kemi një ligj të avancuar për investime strategjike, ligj i cili mbron investitorin e jashtëm i tëri në harmoni me direktivat e Bashkimit Evropian”, theksoi Gashi, duke përmendur edhe aplikacionin e parë të një kompanie për t’u kualifikuar si investitor strategjik me një investim prej rreth 130 milionë euro në fushën e energjisë së ripërtrishme.

E ministri Lluka, prezantoi mundësitë për investime në zonat e veçanta të interesi si Vllahi, Gumnishtë, Karaçë, Baks, Bresalc, Zhegovcë e Deve, ndërsa ekspertët e KPMM-së, përkatësisht Azem Rexha, anëtar i bordit të KPMM-së, në hollësi tregoi për detajet e mundësive të eksploatimit të minierave që gjenden të këto zona të interesit.

Në seancën për Kosovën, të pranishme ishin kompani edhe nga Kina, Bullgaria, Turqia, Shqipëria, Azerbajxhani dhe Republika Demokratike e Kongos.