Zyrtari amerikan demanton mediat serbe

Pikërisht çështja e kufirit me Malin e Zi ishte dhe tema qendrore e konferencës së tij të përbashkët për shtyp me presidentin e Kosovës, Hashim Thaçi

Të hënën për një vizitë zyrtare Kosovën e ka vizituar ndihmës/Sekretari Amerikan i Shtetit për Evropën dhe Euro-Azinë, Wess Mitchell.

Pikërisht çështja e kufirit me Malin e Zi ishte dhe tema qendrore e konferencës së tij të përbashkët për shtyp me presidentin e Kosovës, Hashim Thaçi.

“Kosova shënoi 10-vjetorin e saj si shtet dhe në këtë drejtim ka bërë shumë, duke treguar arritje të mëdha në ekonomi. Por, ajo duhet të ndërmarrë hapa të rëndësishëm për të siguruar rrugën drejt integrimit evropian dhe duhet të zgjidhë çështjen e kufirit me Malin e Zi. Vetëm Kosova mund ta zgjedhë të ardhmen e saj”, ka thënë ai, përcjell albinfo.ch.

Presidenti Thaçi theksoi se askush nuk ka arsye që ta vonojë çështjen e demarkacionit.

Mitchel shpjegoi se nuk ndodhet në Prishtinë për të shpalosur ndonjë plan të veçantë, apo një pako të re për Kosovën, siç raportonin mediat serbe, por për të ofruar përkrahjen amerikane në rrugën e Kosovës dhe Serbisë drejt normalizimit të marrëdhënieve dhe avancimit të tyre drejt BE-së. Të njëjtin mesazh, ai do ta çojë edhe në Beograd.

Në takimin me Thaçin, diplomati i lartë amerikan përcolli gjithashtu një mesazh të fortë për ushtrinë, duke theksuar se askush s’mund t’i vendosë veto transformimit të saj.

Mitchell e nisi nga Prishtina turneun që do ta çojë në Shkup, Beograd, Athinë dhe Nikosi, e që zgjat deri më 17 mars.