Hidhet gaz në Kuvendin e Kosovës

Foto: Lajmi.net

Gazi lotsjellës është kthyer sërish në Kuvendin e Kosovës. Në momentin kur po pritej që të votohej për ratifikimin e demarkacionit me Malin e Zi, deputetët e Vetëvendosjes kanë hedhur dy bombola me gazë lotsjellës gjë që bëri të ndërpritet seanca, përcjell albinfo.ch.

Më herët Shefi i Grupit Parlamentar të LDK-së, Avdullah Hoti, bëri një propozim para se të hidhet në votim projektligji.  “Grupi jonë Parlamentar propozon që në këtë amendament pika 1.2, ku shkruan ‘dokumentacioni zyrtar i komisionit shtetëror për shënjimin e kufirit shtetëror – si orientim’ të renditet si pika 1.3. Lus që të zhvillohen procedurat e nevojshme në Kuvendin e Kosovës dhe ky amendament me këtë ndryshim t’iu sillet deputetëve për votim”, ka deklaruar Hoti.

Menjëherë është mbledhur Komisioni për Punë të Jashtme të cilët kanë votuar për ndryshimet e amandameteve. E në sallën e kuvendit Shefi i Grupit Parlamentar të Lëvizjes Vetëvendosje, Glauk Konjufca, është shprehur edhe një herë kundër demarkacionit të kufirit me Malin e Zi, duke thënë se territori i Kosovës është më esencial në krahasim me liberalizimin e vizave, pasi që vizat nuk do të lëshohen para vitit 2019, ndërkohë që do të vihet edhe kushti për luftimin e korrupsionit.

Por deputeti Ilr Deda ka thënë se një pakicë e vogël nuk mund ti ndalë. Edhe deputeti i LDK-së, Ismet Beqiri ka thënë se kjo që ndodhi është për keqardhje.