Edhe një kusht për vizat

Zyrtarët e lartë të Bashkimit Evropian, përmes një deklarate të përbashkët për media, kanë përshëndetur ratifikimin e marrëveshjes për demarkacionin me Malin e Zi si dhe kanë bërë thirrje që të plotësohet edhe kushti tjetër, ai për luftimin e krimit e korrupsionit.

“Ratifikimi i Marrëveshjes për demarkacionin e kufirit me Malin e Zi, nga ana e Kuvendit të Kosovës, paraqet një arritje reale, një progres të mirëpritur dhe konkret, i cili është në frymën e raporteve të mira fqinjësore, si dhe me strategjinë e re të Komisionit Evropian për Ballkanin. Ratifikimi është, po ashtu, përmbushje e një prej kritereve kyçe për liberalizimin e vizave për Kosovën.

Ashtu siç ka thënë presidenti Juncker gjatë vizitës së tij të fundit në Kosovë, është hap krucial drejt liberalizimit të vizave, që para së gjithash do të jetë në përfitim të qytetarëve të Kosovës. Bashkimi Evropian pret që të gjitha palët në Kosovë të vazhdojnë punën e madhe dhe përpjekjet e suksesshme për të arritur udhëtimin pa viza për popullin e Kosovës dhe në interes të rajonit”, thuhet në deklaratë, përcjell albinfo.ch.