Ka politizim në arsimin kosovar

Përfaqësues të Institucioneve Arsimore kanë vlerësuar se gjendja në sektorin e Arsimit në Kosovë nuk është në nivel të kënaqshëm.

Në një takim të nivelit të lartë dedikuar këtij sektori, kryeministri i Kosovës, Ramush Haradinaj, kërkoi përgjegjësi e angazhim nga të gjithë në zhvillimin e këtij sektori, duke shtruar edhe pyetje se si të përmirësohet kjo gjendje, përcjell albinfo.ch.

Edhe njëherë tjetër Haradinaj përmendi se shkarkimin e bordit të Agjencisë së Akreditimit nuk e ka bërë për arsye personale.

“Nuk i kam shikuar emrat dhe ka mundur të jetë ndonjëri nga kjo tavolinë dhe epilogu ka mundur të jetë i njëjtë, por ka qenë një veprim i parë, një lëvizje e parë, për të ecur dika”, theksoi ai.

Ministri i Arsimit, Shyqiri Bytyqi, ka thënë se në vitin 2019-2020 nxënësit do të mësojnë me libra të rinj të cilët do të hartohen në bazë të kurikulës së re mësimore.

Ai u shpreh se ka politizim në arsim dhe për këtë arsye ka rekomanduar që drejtorët e shkollave të mos jenë më menaxher të qendrave të votimit në ditën e zgjedhjeve.