VV-ja kërkon të vihen kushte në dialogun me Serbinë

Aktivistë të Lëvizjes Vetëvendosje, përmes një aksioni simbolik të mbajtur në sheshin “Skënderbeu” në Prishtinë kanë kundërshtuar bisedimet në mes të presidentit të Kosovës, Hashim Thaçi dhe atij serb, Aleksandër Vuciq. Aktivistja e lëvizjes, Albana Fetoshi, ka thënë se duhet të vihen kushte në dialogun me Beogradin. Ajo ka theksuar se një prej tyre duhet të jetë kërkim falja për të vrarët në luftën e fundit në Kosovë, përcjell albinfo.ch.

“Sot, 19-vjet pas masakrës në Krushë të Vogël kemi dalë t’ia përkujtojmë presidentit që në negociatat pa kushte që po i bëjnë me Serbinë po shkelin mbi gjakun e dëshmorëve. 112 shqiptarë të vrarë në këtë fshat, 19-vjet pas luftës, Serbia ende s’ka kërkuar falje, e Thaçi me entuziazëm të pashoq merr pjesë në negociata. Thaçi do të duhej të kërkonte zbardhjen e fatit të pagjeturve, e jo të darkojë me Vuçiqin, duke bërë temë Kosovën përmes rikthimit të Zajednicës”, ka thënë ajo.