Vështirë të përmbushet kriteri i fundit për liberalizim, s’po luftohet korrupsioni

Drejtori i Agjencisë, Shaip Havolli, ka thënë se me ritmin e kësaj lufte nuk e mendon liberalizimin si proces të kryer

Drejtuesit e Agjencisë Kundër Korrupsion kanë shprehur rezerva për plotësimin e kushtit të vetëm për liberalizimin e vizave, luftën ndaj krimit e korrupsionit.

Drejtori i Agjencisë, Shaip Havolli, ka thënë se me ritmin e kësaj lufte nuk e mendon liberalizimin si proces të kryer, përcjell albinfo.ch.

Ai ka thënë se në këtë drejtim ka rezultatet të vogla. Në prezantimin e raportit vjetor të punës, Havolli deklaroi se me përkushtim të plotë ka vazhduar t’i realizojë detyrat e tij në fushën e hetimit dhe zbulimit të rasteve të korrupsionit, përpjekjet për parandalimin e fenomenit të korrupsionit, si dhe vetëdijesimin e publiku për qasjes ‘zero tolerancë’ ndaj korrupsionit. Sipas këtij raporti megjithëse janë ngritur 109 kallëzime penale shumica prej të cilëve kanë aktakuza, ende asnjë zyrtar publik nuk është dënuar me burgim efektiv.

Kjo sipas Havollit dëshmon edhe për faktin që nevojitet ndryshimi i ligjit për konflikt të interesit, i cili në të shumtën e rasteve veprat e kryera nga zyrtarët, i cilëson si kundërvajtje.

Ndryshe nga ai, ministrja e Integrimit Evropian, Dhurata Hoxha, ka thënë se kosovarët do të lëvizin lirshëm në shtetet e BE-së brenda këtij viti.