Mërgimtari dhuron dy autoambulanca, një në Drenas, një në Skenderaj

Kryetari i Komunës së Drenasit, Ramiz Lladrovci të enjten ka pritur në takim Gani Bytyçin nga fshati Krajkovë i komunës së Drenasit, me vendqëndrim në Norvegji, i cili e ka konfirmuar kryetarin se do të sjellë një automjet për shërbime të Qendrës Kryesore të Mjekësisë Familjare “Dr.Hafir Shala” në Drenas dhe një tjetër për QKMF-në në Skenderaj, bëhet e ditur përmes një komunikate për media, përcjell albinfo.ch.

Kryetari i Komunës, Ramiz Lladrovci ka falënderuar mërgimtarin Bytyçi për këtë ndihmë që i ka ofruar QKMF-së së Drenasit dhe të Skenderajt dhe ka thënë se mërgata shqiptare çdoherë ka ndihmuar vendin dhe ka kontribuar për të mirën e qytetarëve.

Kujtojmë që kjo autoambulancë është e dyta gjatë një periudhe brenda gjashtë muajve që i dhurohet QKMF-së në Drenas, po ashtu nga mërgimtarët që jetojnë e veprojnë jashtë vendit.