Avokati i popullit konfirmon dëbimin në Turqi të 6 të arrestuarve të djeshëm

"Shtetasit në fjalë janë ndaluar më 29 mars dhe  janë përcjellë të njëjtën ditë, në Aeroportin Ndërkombëtar të Prishtinës, nga ku ka ndodhur dëbimi për në shtetin e tyre të origjinës"

Avokati i Popullit Hilmi Jashari nëpërmjet një deklarate shprehet jashtëzakonisht i shqetësuar me situatën e krijuar, që nga marrja e informatës për arrestimin e gjashtë shtetasve turq, me leje qëndrimi në vendin tonë.

Në deklaratë të Avokatit thuhet se janë bërë përpjekje të vazhdueshme për të siguruar informacion zyrtar për vendndodhjen  dhe gjendjen e tyre, mënyrën e arrestimit dhe aktin e deportimit drejt shtetit të Turqisë, por kjo ka qenë e pamundur gjatë ditës së djeshme dhe paraditen e sotme.

“Pas insistimit të pandërprerë të Avokatit të Popullit, Policia e Kosovës (PK), respektivisht Drejtoria për Migrim dhe të Huaj (DMH), sot, në ora 14:00, ka njoftuar se,  nga ana e DMH-së së PK-së, më 29 mars 2018, janë nxjerrë gjashtë Urdhra për largim me forcë të shtetasve në fjalë, nga territori i Republikës së Kosovës, për në Turqi. Lëshimi i këtyre Urdhër largimeve me forcë, është aplikuar duke u bazuar në Vendimet e Departamentit për Shtetësi, Azil dhe Migracion (DSHAM) të MPB-së, që mbajnë datën 23 mars , të përcjella tek DMH, më 28 mars .

Sipas njoftimit të PK-së, shtetasit në fjalë janë ndaluar më 29 mars dhe  janë përcjellë të njëjtën ditë, në Aeroportin Ndërkombëtar të Prishtinës, nga ku ka ndodhur dëbimi për në shtetin e tyre të origjinës”, thuhet veç tjerash në deklaratën e Avokatit të Popullit, Hilmi Jashari.